رميتي الدبله في وشه
ورحمة لبعض !!
دموعي نزلت بغزارة وأنا بقولها بحزن
_بترخصيني ليه يا ماما !!
ليه كدا !!
شديتني لحضنها وبكينا إحنا الأتنين في وسط كلامها
_حقك عليا يا دنيا حقك عليا يا قلب أمك أنا آسفة
سامحيني خۏفي عليك من ألسنة الناس عماني حقك على قلبي !!
بعدت عن حضنها وبصيتلها وعيني مدمعة
_مش عايزاه.
_في ستين داهية.
مسحت على شعري وهي بتبص ليا بحب و بتقول
_مش مهم.
_والقاعة والناس
مسحت دموعي بكفها الحنين وهي بتردد
_يغوروا قصاد ضفرك.
اترميت في حضنها وبوستها وبعدت ولسه هتكلم
قالت بصوت هادي
_أنزلي يا دنيا بقالك كتير مخرجتيش
_بس ..
_أنزلي وأنا هتصرف
مسحت دموعها وبوستها وسبتها وخرجت.
حمل كبير إنزاح من على قلبي
البني آدم بيحس بالسکينة لما يلاقي إلي يبقى فضهره وسنده يلاقي حماه حتى لو كان شخص واحد يكفي أنه يلاقيه
دخلت شارعنا بليل وأنا بدندن بصوتى لحد ما
لقيته في وشي فجأه أعوذ بالله.
_أخيرا رجعتي ! مستنيك من بدري
_أمشي من هنا هي أمي مقالتلكش ولا أي أنا مش عيزاك.
_لا أمك قالت وطردتنا وفرجت علينا العمارة كلها
_وأنت عايز مني أي بقى ألملك كرامتك إلي اتبعترت !
_دنيا أسمعي بعد كل دا أنا لسه باقي عليك ما تنهيش كل حاجة بينا.
حط الدبله على كف إيدي وكمل
_إديني فرصة أوضحلك طيب يومها كنت متخانق مع مديري في الشغل وأتخصملي من المرتب أعصابي كانت تعبانة ومحتاج أرتاح وأنت أتأخرتي كتير عشان كدا خرجت عن شعوري و ...
كانت تعبانة برضو وأنت بتمنعني عن صحابي وقرايبي وكانت تعبانة لما قعدتني من الشغل!!
هيثم الموضوع بالنسبالي منتهي !!
أنت لو آخر راجل في الدنيا مش هتجوزك.
أنا أكيد غلط لما سمعت كلام الحلو..ف دا بس معلش بنتعلم من أخطائنا.
_كدا يا دنيا !!
طب وريني بقى هتاخدي عفشك إلي في شقتي إزاي وشوفي الناس هتقول عليك أي وأنت بتحوليه !!
حطيت الدبلة في إيده وهو خدها ومشي بعد ما ظهر على وشه علامات فقدان الأمل
طلعت تليفوني ورنيت على عمر إلي أصلا كان واقف في البلكونة بيتفرج اللئيم
_أيوا يا دنيا خير
_محتاجة عربيات لوري كبيرة وعربيات نص نقل وعمال رفع
_نعم يختي !! ليه
_هنقل عفشي من شقة هيثم لهنا.
أنا سيبته
اصطنع نبرته البريئة
_يااه معقوله ليه كدا بس
_ملوش في الطيب نصيب بقى بسرعة يا عمر هنتساير على التليفون !
_ طيارة
_بس حاسب حاسب يا أحمد أرجع سنة لورى خد بالك لتغبط في ياسر.
بصيتله بإستغراب
_أنت عارف أساميهم كلهم إزاي
ضحك بصوت عالي
_أصلهم صحابي.
بصيتله بعدم تصديق فكمل
_والله صحابي أصل هلاقي منين عمال الساعة عشرة بليل دول بيخلصوا شغل بدري فكدرت صحابي وجبتهم يرفعوا العفش.
ضحكت ضحكت من قلبي بجد دا كدر صحابه عشاني
_لا لا عشرة من عشرة ونجمة.
سكتنا للحظة وبعدين قلت بمكر
_على فكرة عادي في ناس معندهاش ضمير
_إيه
_دا رد على سؤالك إمبارح إزاي حد ممكن يزعل واحدة زي دنيا.
ملامحه ارتبكت
_أنت سمعتي لالا أنت سمعتي غلط أنا كنت بتكلم عن الدنيا والحياة وكدا.
_وهي الدنيا صوتها حلو
سرح بنظراته بعيد وهو بيحك راسه بحيرة مصطنعه
_لا مش عارف الحقيقة
سكت لوهله وبعدين قلت
_أنا مش بحب شعري وهو ملولو كدا.
_بس أنا بحبه
بصيتله بمكر بعد ما خليته يعترف بسهوله
_اه يا بنت الإيه.
ضحكت من قلبي فقال بسرعة
_بحبك
عيني لمعت وأنا بنطق
_ما أنا عارفة
_طب وأنت
قلت بشقاوة
_بفكر !
_براحة
على قلبي طيب!!
_نعم !!
صوته علي وهو بيشاور لنادر
_ على الأزاز يبني براحة على الإزاز مش كدا !!
لست مجرد فتاة لم أخلق لأهان خلقت في خفة الفراشة لأكون لك عونا في سبل حياتك فلا تقلتلني فتقتل قلبك قبلي
سلمى_بسيوني
